Mae’r Aelod o’r Senedd Paul Davies AS wedi bod yn trafod gwasanaethau strôc yn y Senedd gyda’r Prif Weinidog, Mark Drakeford AS. Dywedodd Mr Davies wrth y Prif Weinidog fod y graddau diweddaraf gan Raglen Archwilio Genedlaethol Strôc Sentinel (SSNAP) yn golygu bod angen gwelliannau difrifol mewn gofal strôc yn ardal Bwrdd Iechyd Prifysgol Hywel Dda.
Mynychodd Mr Davies dderbyniad i drafod dyfodol gwasanaethau strôc hefyd. Roedd y digwyddiad yn gyfle i glywed mwy gan bobl sydd wedi cael eu heffeithio gan strôc, dysgu am waith parhaus Gweithrediaeth GIG Cymru i drawsnewid gwasanaethau strôc a chysylltu â’r gymuned strôc ehangach yng Nghymru.
Dywedodd Mr Davies, “Mae strôc yn bedwerydd ar y rhestr o gyflyrau sy’n lladd yng Nghymru ac mae’n hanfodol bod gwelliannau’n cael eu gwneud ar fyrder, er mwyn sicrhau’r canlyniadau gorau posibl i gleifion. Mae’n siomedig iawn i weld bod graddau wedi gostwng ar gyfer gwasanaethau adsefydlu fel therapi galwedigaethol, ffisiotherapi a therapi lleferydd ac iaith. Mae’n hanfodol bod y gwasanaethau hyn yn derbyn y cymorth a’r adnoddau angenrheidiol i ddarparu gofal effeithiol i gleifion strôc yn Sir Benfro a byddaf yn parhau i dynnu sylw at bwysigrwydd buddsoddi yn y gwasanaethau hyn bob cyfle a gâf.”
Dolen i ffigurau SSNAP ar gyfer gwasanaethau strôc – https://www.strokeaudit.org/results/Clinical-audit/National-Results.aspx
Mae cofnod o’r drafodaeth yn y Senedd rhwng Paul a’r Prif Weinidog ar gael yma – https://cofnod.senedd.cymru/Plenary/13344
Llun – yr Aelod o’r Senedd Paul Davies mewn digwyddiad i drafod dyfodol gwasanaethau strôc yng Nghymru.
