Mae’r Aelodau o’r Senedd dros Sir Benfro, Paul Davies a Samuel Kurtz, wedi croesawu penderfyniad Llywodraeth Cymru i roi'r gorau i gynigion a fyddai wedi gweld cleifion yn cael deintydd gwahanol ar gyfer pob archwiliad, yn hytrach nag aros gyda'u practis deintyddol teuluol.
Yn dilyn ymgynghoriad cyhoeddus ar ei chynlluniau i ddiwygio deintyddiaeth, a ddenodd dros 6,000 o ymatebion, mae’r Aelodau o'r Senedd wedi ailadrodd eu galwadau ar Lywodraeth Cymru i wrando ar farn y proffesiwn a chleifion ledled Cymru.
Dangosodd yr ymgynghoriad fod 77.2% o'r ymatebwyr yn anghytuno y byddai newidiadau Llywodraeth Cymru yn helpu i sicrhau mynediad teg at ofal deintyddol y GIG.
Dywedodd Mr Davies, "Rwy'n falch fod Llywodraeth Cymru wedi newid ei meddwl ynglŷn â chynlluniau i ddyrannu cleifion i unrhyw bractis, gan fod dilyniant gofal yn hanfodol ac mae angen ei ddiogelu. Fodd bynnag, mae'r diwydiant wedi ei gwneud hi'n glir bod yn rhaid i Lywodraeth Cymru fynd ymhellach a mynd i'r afael â'i phryderon eraill hefyd."
"Mae'r system ar dorri - gwyddom nad yw llawer o gleifion yn gallu cael mynediad at wasanaethau yn Sir Benfro ac mae deintyddion yn rhwystredig, wedi'u llethu ac mewn perygl o ddiffygio."
"Byddai'r cynigion presennol hefyd yn arwain at fylchau o hyd at ddwy flynedd rhwng archwiliadau i rai cleifion, sy’n annerbyniol. Rhaid i Lywodraeth Cymru fanteisio ar y cyfle hwn i fyfyrio ac ailystyried ei chynigion ac yna dod o hyd i ffordd ymlaen sy'n gweithio i gleifion ac i’r proffesiwn."
Dywedodd Mr Kurtz, "Mae hon yn fuddugoliaeth i synnwyr cyffredin ac i bawb a leisiodd eu barn yn ystod yr ymgynghoriad. Mae cleifion yn haeddu gofal dibynadwy, parhaus, nid blynyddoedd rhwng archwiliadau neu system sy'n eu gadael i aros mewn rhwystredigaeth.
"Er ei bod yn iawn bod Llywodraeth Cymru wedi camu'n ôl o ddyrannu cleifion yn awtomatig, mae'r gwasanaeth yn parhau i fod dan bwysau difrifol, gyda llawer yn methu cael mynediad at driniaeth a deintyddion yn agos at ddiffygio.
"Rhaid i weinidogion nawr fynd ymhellach, ailystyried eu cynigion, a gweithio'n adeiladol gyda'r proffesiwn i fynd i'r afael â'r argyfwng ehangach yn neintyddiaeth y GIG."
