Mae Paul Davies, AS Ceredigion Penfro, wedi cwrdd ag Openreach Cymru yn y Senedd i drafod y cynnydd o ran cyflwyno band eang ffeibr llawn ledled y Gorllewin, gan godi pryderon am gysylltedd mewn rhannau o'r rhanbarth.
Ar hyn o bryd, Sir Benfro sydd â'r lefel isaf o gwmpas ffeibr llawn yng Nghymru, sef dim ond 59%, gyda Cheredigion â’r ail lefel isaf ar 67%. Er bod cynnydd yn cael ei wneud, pwysleisiodd Mr Davies fod angen gwneud mwy i gau'r bwlch a sicrhau nad yw cymunedau gwledig yn cael eu gadael ar ôl.
Dywedodd Mr Davies, "Mae ehangu band eang ffeibr llawn yn hanfodol i gefnogi twf economaidd, gwasanaethau cyhoeddus a chynhwysiant digidol ledled Cymru ac rydyn ni i gyd angen mynediad at fand eang cyflym, dibynadwy yn ein bywydau.
“Er bod y rhwydwaith ffeibr llawn bellach ar gael i 80% a mwy o adeiladau ledled Cymru, mae'r signal mewn ardaloedd fel Sir Benfro a Cheredigion yn dangos nid da lle gellir gwell. Mae angen i ni weld ffocws cryfach ar yr ardaloedd hyn fel y gall trigolion a busnesau elwa ar yr un cyfleoedd â'r rhai mewn rhannau o Gymru sydd wedi'u cysylltu'n well.”
“Byddaf yn parhau i weithio gydag Openreach Cymru i sicrhau bod band eang yn cael ei gyflwyno mor gyflym ac effeithlon â phosibl. Mae gwella seilwaith digidol yn hanfodol ar gyfer twf economaidd ac rydw i am sicrhau nad yw cymunedau yn Sir Benfro a Cheredigion yn cael eu gadael ar ôl.”
