Mae'r Aelod o'r Senedd lleol, Paul Davies, wedi croesawu'r cyhoeddiad "hirddisgwyliedig" ar gyfer ymchwiliad cyhoeddus ledled y DU i gyffredinrwydd gangiau sy’n meithrin perthynas amhriodol (gangiau grwmio) - ac wedi annog Llywodraeth Cymru i gydweithredu'n llawn.
Daeth yr alwad ar ôl i Arweinydd y Ceidwadwyr Cymreig, Darren Millar AS, godi'r mater yn uniongyrchol gyda'r Prif Weinidog yn y Senedd, gan bwyso arni i ryddhau gohebiaeth berthnasol a chytuno i gwrdd â goroeswr cam-drin o Gymru.
Fe wnaeth Mr Millar - arweinydd cyntaf plaid yng Nghymru i alw am ymchwiliad o'r fath – herio’r Prif Weinidog dros wrthodiad cynharach ei llywodraeth i gefnogi ymchwiliad penodol i Gymru. Rhybuddiodd, pe bai Gweinidogion Llafur wedi gweithredu ym mis Chwefror, y byddai ymchwiliad pwrpasol i Gymru eisoes ar y gweill.
Roedd cwestiynau Mr Millar yn dilyn sgyrsiau gydag "Emily," goroeswr o Gymru a gafodd ei meithrin i berthynas amhriodol yn ei harddegau, ei masnachu ledled y DU, a'i threisio fwy na mil o weithiau gan gangiau o ddynion.
Anogodd Mr Millar y Prif Weinidog hefyd i sicrhau bod cyrff datganoledig - gan gynnwys gwasanaethau cymdeithasol, awdurdodau lleol, y GIG, a'r Comisiynydd Plant - yn cydweithredu'n llawn â'r ymchwiliad.
Yn dilyn cyhoeddi’r ymchwiliad ledled y DU, dywedodd Mr Davies:
"Nawr bod yna ymchwiliad i gangiau meithrin perthynas amhriodol wedi'i gadarnhau, rhaid i Lywodraeth Cymru gydweithredu'n llawn trwy sicrhau bod yr holl ohebiaeth berthnasol gyda'r heddlu, y cynghorau a’r gwasanaethau cymdeithasol yn cael ei chyhoeddi."
"Rhaid clywed gan ddioddefwyr a goroeswyr dewr fel Emily ac rwy'n gobeithio y bydd y Prif Weinidog o leiaf yn cwrdd â hi i wrando ar ei phrofiad.
"Mae'n rhaid i ni nawr wneud yn siŵr bod yr ymchwiliad hwn yn darparu cyfiawnder i bob goroeswr. Does dim lle i oedi."
