Mae'r Aelod o'r Senedd, Paul Davies, wedi ymateb i adroddiadau y gallai Cyfoeth Naturiol Cymru (CNC) gytuno ar gais i amrywio trwydded gan Resources Management UK Ltd (RML), sy'n rhedeg safle tirlenwi Withyhedge ger Hwlffordd.
Mae CNC yn ceisio barn ar ei benderfyniad drafft, a hynny drwy ymgynghoriad cyhoeddus fydd yn para pedair wythnos, ac yn cau ddydd Iau 26 Mawrth.
Mae Mr Davies, sydd wedi galw droeon am gau'r safle yn barhaol ar ôl diffyg cydymffurfiaeth yn y gorffennol, wedi annog CNC i beidio â chyhoeddi'r amrywiad i’r drwydded.
Meddai Mr Davies, "Rwy'n bryderus iawn o glywed bod Cyfoeth Naturiol Cymru yn ystyried amrywio trwydded RML, fel y gall dderbyn hyd yn oed mwy o wastraff ar safle tirlenwi Withyhedge."
"Mae gan RML hanes o ddiffyg cydymffurfio, i'r graddau fel ei fod wedi cael ei restru fel y gosodiad a ganiateir sy'n perfformio waethaf yng Nghymru yn 2023 a 2024 – ac felly mae'n destun pryder mawr bod y gweithredwr yn ceisio cynyddu faint o wastraff y caiff ei dderbyn ar y safle."
"Yn fy marn i, dylai'r safle gael ei gau’n barhaol, yn hytrach na rhoi caniatâd iddo dderbyn gwastraff ychwanegol, ac felly rwy'n annog Cyfoeth Naturiol Cymru i wrthod yr amrywiad hwn ar y drwydded."
