Mae’r Aelodau o’r Senedd lleol, Paul Davies a Samuel Kurtz, wedi rhybuddio bod y diwydiant twristiaeth ledled y Gorllewin yn wynebu ei aeaf mwyaf heriol ers blynyddoedd, wrth i bwysau ariannol a rheoliadau newydd ddod ynghyd ar yr adeg waethaf bosibl.
Ochr yn ochr â chynlluniau Llywodraeth Lafur Cymru ar gyfer treth dwristiaeth a system gofrestru a thrwyddedu newydd ar gyfer llety gwyliau hunanddarpar, mae gweithredwyr twristiaeth yn y Gorllewin eisoes yn gorfod ymdopi â'r trothwy 182 noson ar gyfer y dreth gyngor, biliau cyflog uwch o ganlyniad i’r cynnydd diweddar yn yr isafswm cyflog, a chyfraniadau Yswiriant Gwladol uwch gan gyflogwyr.
Gyda'r tymor gwyliau bellach yn dod i ben, mae llawer o letyau gwely a brecwast arfordirol bach, bythynnod teuluol a hafanau gwledig, busnesau sy'n dibynnu'n helaeth ar haf llewyrchus, yn wynebu storm berffaith o gostau cynyddol a llai o ymwelwyr.
Mae cynrychiolwyr twristiaeth yn rhybuddio y gallai effaith gronnol y newidiadau hyn fod yn arbennig o niweidiol i Sir Benfro, lle mae'r economi ymwelwyr yn cynnal miloedd o swyddi ac yn cefnogi cymunedau o Ddinbych-y-pysgod i Dyddewi. Mae pryder cynyddol y gallai haenau ychwanegol o reoleiddio hefyd atal gwesteiwyr achlysurol a darparwyr llai sy'n hollbwysig yn ystod cyfnodau brig a digwyddiadau lleol mawr fel Ironman Cymru.
Meddai Paul Davies, AS Preseli Sir Benfro: "Mae busnesau twristiaeth yn y Gorllewin wedi bod yn glir am yr heriau maen nhw'n eu hwynebu ac eto, yn hytrach na darparu'r gefnogaeth i'r busnesau hyn, mae Llywodraeth Cymru a Llywodraeth San Steffan wedi cyflwyno mesurau sydd wedi rhoi pwysau pellach ar y sector."
"Rydw i wedi galw'n gyson ar Lywodraeth Cymru i ymgysylltu'n adeiladol â gweithredwyr twristiaeth ac i weithio ar y cyd ar atebion a fydd yn cefnogi busnesau twristiaeth lleol."
"Rhaid i Weinidogion wrando ar y rhai ar lawr gwlad, dileu rheoliadau diangen a darparu cymorth ymarferol sy'n sicrhau cynaliadwyedd hirdymor y sector twristiaeth yng Nghymru."
Meddai Samuel Kurtz AS:
"Twristiaeth yw asgwrn cefn ein heconomi yn y Gorllewin, ac wrth i ni fynd i mewn i'r misoedd tawelach, bydd llawer o fusnesau lleol yn teimlo'r pwysau yn fwy nag erioed.
"Yn hytrach nag ychwanegu haenau o fiwrocratiaeth gostus, dylai Llywodraeth Cymru fod yn cefnogi gweithredwyr sydd eisoes yn brwydro yn erbyn y trothwy 182 noson, biliau cyflog uwch a chyfraniadau Yswiriant Gwladol uwch, yn ogystal â llai o ymwelwyr wrth i'r tymor ddod i ben.
"Rwy'n galw ar Lywodraeth Cymru i gydnabod bod effaith gronnol yr holl newidiadau hyn yn cael effaith ddinistriol ar y diwydiant twristiaeth, ac iddyn nhw oedi, gwrando ac ailystyried cyn i fusnesau mwy hirsefydlog fynd i’r wal."
