Bydd cymhorthfa fusnes ar y cyd yn cael ei chynnal ar 17 Chwefror yn dilyn galw mawr gan fusnesau lleol ar ôl fforwm ardrethi busnes ar-lein hynod lwyddiannus a drefnwyd gan yr Aelodau o'r Senedd, Samuel Kurtz AS a Paul Davies AS. Denodd y fforwm fwy na 150 o gofrestriadau gan fusnesau ledled yr ardal.
Mae'r digwyddiad ar-lein yn tynnu sylw at bryder eang am ardrethi busnes, proses ailbrisio’r Asiantaeth Swyddfa Brisio a phwysau costau cynyddol y mae cwmnïau lleol yn eu hwynebu. Cododd cyfranogwyr gwestiynau manwl ynghylch sut mae gwerthoedd ardrethol yn cael eu cyfrifo, pa agweddau y gellir eu herio, ac effaith ailbrisiadau ar adeiladau unigol. Mae'r lefel uchel o ymgysylltu yn dangos awydd clir am gymorth mwy personol ac ymarferol.
Mewn ymateb, mae'r gymhorthfa wedi'i threfnu i roi cyfle i berchnogion busnes drafod eu hamgylchiadau unigol yn uniongyrchol gyda'u Haelodau o'r Senedd. Bydd y sesiwn yn darparu lleoliad cyfrinachol, un-i-un i fusnesau godi materion penodol, ceisio eglurhad a derbyn canllawiau wedi'u teilwra.
Meddai Samuel Kurtz AS: "Dangosodd yr ymateb i'r fforwm ardrethi busnes pa mor gryf yw'r galw am gyngor clir ac ymgysylltu adeiladol. Gyda mwy na 150 o gofrestriadau, roedd hi’n amlwg bod llawer o fusnesau eisiau'r cyfle i archwilio eu sefyllfaoedd eu hunain yn fwy manwl, a dyna'n union yw nod y gymhorthfa hon."
"Mae busnesau yng Ngorllewin Cymru ar y dibyn, dyna'r neges gyson rydyn ni'n ei chlywed. Mae cyflogwyr yn dweud wrthym fod y system ardrethi busnes presennol yn rhoi straen go iawn ar y stryd fawr ar adeg pan maen nhw eisoes yn wynebu costau staffio, ynni a chyflenwi cynyddol. Mae'n hanfodol bod Llywodraeth Cymru yn gwrando ar y rhai ar lawr gwlad sy'n cymryd y risgiau, yn darparu'r swyddi ac yn gyrru'r economi leol. Dylai polisi annog buddsoddiad a thwf, nid ei gosbi."
Ychwanegodd Paul Davies AS: "Rydyn ni am wneud popeth o fewn ein gallu i gefnogi busnesau yn Sir Benfro ac mae'r gymhorthfa hon yn gyfle gwerthfawr i Samuel a minnau wrando ar eu pryderon penodol a thrafod sut y gallwn ni wneud sylwadau ar eu rhan a’u cynrychioli yn y ffordd orau."
"Mae busnesau'n dweud wrthym eu bod yn teimlo fel petaen nhw’n cerdded ar raff – o ardrethi busnes yn cynyddu i gostau cynyddol i heriau'r gweithlu, mae busnesau'n amlwg yn teimlo'r straen.
"Mae'r gymhorthfa fusnes yn gyfle i eistedd i lawr yn gyfrinachol i drafod pryderon a dod o hyd i ffordd ymlaen. Y ffordd orau i Samuel a minnau ddylanwadu ar Lywodraeth Cymru yw trwy fynd â thystiolaeth go iawn a phrofiad bywyd yn uniongyrchol at Weinidogion, i wneud achos cryf a chredadwy dros newid."
