Mae Aelodau o'r Senedd Sir Benfro, Paul Davies a Samuel Kurtz, wedi ysgrifennu at Arweinydd Cyngor Sir Penfro yn galw am weithredu ar unwaith i fynd i'r afael â chyfraddau absenoldeb cynyddol disgyblion mewn ysgolion lleol.
Mae ffigurau newydd yn datgelu darlun brawychus ledled Cymru, gydag absenoldebau heb eu hawdurdodi mewn ysgolion uwchradd bellach bron i ddwbl yr hyn yr oedden nhw bum mlynedd yn ôl.
Yn Sir Benfro, mae pryderon arbennig gan fod y data'n dangos bod nifer y disgyblion a gollodd yr ysgol yn 2018/19 yn 34,177 ac roedd y ffigur hwnnw wedi codi i 66,810 yn 2023/24.
Mae pryderon y gallai'r ffigurau hyn gynyddu eto heb ymyrraeth i gael plant yn ôl i'r ystafell ddosbarth, ac felly mae Mr Davies a Mr Kurtz wedi galw ar Gyngor Sir Penfro i nodi sut mae'n bwriadu mynd i'r afael â'r mater hwn.
Meddai Mr Davies: "Mae'r ffigurau hyn yn achos pryder mawr, ac mae angen cymryd camau ar unwaith. Mae'n amlwg bod angen gwneud mwy i gefnogi teuluoedd ac ysgolion i gael plant yn ôl i ystafelloedd dosbarth. Mae pob diwrnod a gollir yn colli cyfle i ddysgu, tyfu a ffynnu.
"Rhaid i Gyngor Sir Penfro amlinellu sut mae'n mynd i'r afael â'r mater hwn ac esbonio beth sy'n cael ei wneud i ddatrys y broblem hon."
Meddai Mr Kurtz, "Mae rhieni ac athrawon i gyd yn dweud wrthym ni na all y sefyllfa bresennol barhau. Mae absenoldeb parhaus nid yn unig yn amharu ar ganlyniadau arholiadau, mae'n gwaethygu anghydraddoldeb ac yn niweidio lles pobl ifanc.
"Mae'n rhaid i'r cyngor weithio gydag ysgolion, gwasanaethau iechyd a grwpiau cymunedol i ddeall pam mae cymaint o blant yn aros i ffwrdd a rhoi camau clir, mesuradwy ar waith.
"Mae pob plentyn yn Sir Benfro yn haeddu'r cyfle i wireddu ei lawn botensial ac mae hynny'n dechrau gyda bod yn yr ysgol."
