Mae’r Aelodau o’r Senedd lleol, Paul Davies a Samuel Kurtz, wedi dangos eu cefnogaeth i bobl sy'n byw gyda chanser drwy fynychu digwyddiad blynyddol Bore Coffi Macmillan yn y Senedd yr wythnos diwethaf.
Roedd y digwyddiad, a ddaeth ag ASau o bob cwr o Gymru at ei gilydd, yn tynnu sylw at y gwaith anhygoel mae Cymorth Canser Macmillan yn ei wneud i helpu pobl sy'n byw gyda chanser a'u teuluoedd. Mae Boreau Coffi Macmillan, a gynhelir mewn cymunedau ledled y DU, yn ffordd hanfodol o godi ymwybyddiaeth a chodi arian i sicrhau bod y rhai sy’n cael eu heffeithio gan ganser yn cael y gofal a'r gefnogaeth sydd eu hangen arnyn nhw.
Canmolodd y ddau Aelod waith yr elusen a haelioni pobl Sir Benfro sy'n parhau i gefnogi ymdrechion codi arian flwyddyn ar ôl blwyddyn.
Ar ôl y digwyddiad, dywedodd Samuel Kurtz:
"Roedd hi’n wych mynychu Bore Coffi Macmillan yn y Senedd a dangos fy nghefnogaeth i'r gwaith rhagorol mae Macmillan yn ei wneud ledled y Gorllewin.
"Mae gan gymaint ohonom ni ffrindiau, aelodau o'r teulu neu gymdogion sydd wedi’u heffeithio gan ganser, ac mae'r gefnogaeth mae Macmillan yn ei darparu yn gwneud byd o wahaniaeth wrth helpu pobl drwy gyfnodau anhygoel o anodd.
"Hoffwn dalu teyrnged i'r holl wirfoddolwyr lleol a’r rhai sy’n codi arian sy'n rhoi o’u hamser a'u hegni i gefnogi Macmillan. Mae pob cacen a bobwyd, pob punt a godwyd, yn gwneud cyfraniad mawr at sicrhau nad yw pobl sy'n byw gyda chanser yn ei wynebu ar eu pennau eu hunain."
Ar ôl y digwyddiad, dywedodd Paul Davies:
"Mae Macmillan yn gwneud gwaith gwych yn cefnogi cleifion canser drwy gydol eu taith, ac roeddwn i'n falch o ddangos fy nghefnogaeth drwy fynychu eu bore coffi yn y Senedd.
"Fel rhywun sy'n byw gyda chanser, rwy'n ymwybodol iawn o'r heriau mae rhai pobl yn eu hwynebu. Mae Macmillan yn cynnig help, cefnogaeth a chyngor ymarferol, fel y gall pobl fyw bywydau mor llawn â phosibl.
"Mae pob paned yn bwysig - drwy gynnal digwyddiadau hwyliog, mae pobl yn dod at ei gilydd, ond mae arian hollbwysig yn cael ei godi hefyd fel y gall Macmillan barhau i gynnig cefnogaeth i'r rhai sydd ei hangen."
