Mae'r Aelod o'r Senedd lleol, Paul Davies, wedi croesawu penderfyniad Cabinet Cyngor Sir Penfro i oedi ei gynllun arfaethedig i ail-alinio ffyrdd yn Niwgwl.
Dywedodd Mr Davies, sydd wedi bod yn gweithio'n agos gyda'r gymuned leol ar gynnig amgen sy'n fwy fforddiadwy ac yn fwy sensitif i'r amgylchedd, ei fod yn falch bod y Cabinet wedi atal ei gynlluniau costus ac anogodd yr awdurdod i roi ystyriaeth lawn i'r cynllun cymunedol.
Meddai Mr Davies: "Mae erydiad arfordirol yn Niwgwl wedi bod yn broblem ers cyn cof, ac mae'n hanfodol bod unrhyw ymateb yn effeithiol ac yn gymesur. Mae'r gymuned wedi datblygu ei Chynllun Mynediad i’r Traeth ac Ailalinio Marian Niwgwl ei hun sy'n cynnig dull llai ymledol a fyddai'n lleihau costau i'r Cyngor a threthdalwyr lleol yn sylweddol."
"Mae Cabinet Cyngor Sir Penfro yn iawn i atal ei gynllun ei hun rhag mynd yn ei flaen ac rwy'n awr yn annog y Cyngor i ystyried cynnig y gymuned, sy'n sicrhau cydbwysedd llawer gwell rhwng diogelu'r amgylchedd, cyfrifoldeb ariannol ac anghenion trigolion lleol."
